СТАТУТ ВКЛ 1566 ГОДА 

РОЗДЕЛ ПЕРВЫЙ. О ПЕРСОНЕ ГОСПОДАРСКОЙ

АРТЫКУЛ 1

Вси обыватели Великого Князства Литовского оуным правом писаным и от нас даным сужоны быти мают.

Наперед мы Господар обецуем и шлюбуем под тоюж прысегою, которую учинили есьмо всим обывателем всих земль того панства нашого Великого Князства Литовского, иж всих княжат, панов рад духовных и свецких, панов хоруговных, шляхту, места и всих подданых наших и всих станов в том панстве нашом Великом Князстве Литовском, также и земль Русских Кіевское, Жомоитское, Волынское, Подляшское и иных земль прислухаючых к тому панству нашому, почоншы от вышнего стану аж и до нижнего, тыми одными правы писаными от нас даными судити исправовати.

АРТЫКУЛ 2

Мы Господар обецуем и шлюбуем никого не карати на заочное повееданье, хотя бы се дотыкало и о ображенье маестату нашого господарского; и хто теж што на кого вел, а не довел, тым сам мает каран быти.

 Теж предречоным прелатом княжатом, понятом, паном, радам духовным и свецким, паном хоруговным шляхтам и местам земли Великого Князства Литовского, Руское, Кіевское, Жомоитское, Волынское, Подляшское, Смоленьское, Полоцкое, Витебское, Мстиславское и иных земль Великого Князства Литовского, обецуем словом нашим господарским, иж над жадного человека выданье албо осоченье явное таемное и подозренье тых станов вышеймененых карати не хочем ани винити которою кольвек виною пенежною, кривавою, везеньем, або достоенств врядов або именья отнятьем; нижли аж бы первей у суду явным рядом и поступом права, коли жалобник то есть повод и отпор обжалованый очивисте станут, и достаточне на конец будут поконаны, которые по суде и таковом поконанью винни, мають быти караны виною у артыкулех нижей описаных меновите назначоною. А хто бы теж кого колвек, обмовляючи вчинил к соромоте и зелживости, а шло бы о честь або о горло або о которое кольвек скаранье; тогды тоть, хто на кого мовит и ведет, а не доведет, тым караньем сам мает быти каран.

АРТЫКУЛ 3

О ображенье маестату господарского.

О ображенье маестату господарского так се разумеет, колибы хто змову албо спикненье албо бунт учинил на здоровье наше господарское, хотя бы пан Бог уховал, иж бы оная змова не была учынком пополнена; таковый за слушным доводом, як о том нижой описано, честь и горло и именье стратит. Теж кгды маестат наш ображон бывает с тое причыны, кгды бы хто бунтовал покой посполитый врушаючы против нас Господара ку шкоде и Речы Посполитое, и мынцу без воли нашое бил явне; а чого Боже уховай на нас смерти, так теж и на потомки наши Великіе Князи Литовскіе, по зешстях их хотечы хто осести и опоновати тое панство Великое Князство и Господарем быти на нем, войско люд служебный сбирал и выводил; хто бы теж з непріятелми порозуменье мел, листы до них або послы против нам Господарю и Речы Посполитое або остерегаючы слал, тым непріятелем якуюж кольвек помоч давал, хотя бы теж замок наш непріятелеви подал; хто бы теж люди непрыятельскіе в панство наше Великое Князство Литовское зрадливе привел, а то бы на него слушне и справедливе было переведено таким же доводом, яко нижей описано: таковый с права з розсудку нашого с паны радами нашими Великого Князства Литовского честь горло тратить, и таковаго зрадцы дети сынове за таковый выступок отца своего безецными будут, а именья того зрадцы отчызные выслужоные которым кольвек обычаем набытые мимо дти и близкіе на нас Господаря приходять. Ведьжо жоны таковых здрайц которіе не будуть ли ведали тое здрады мужов своих, а с того се выведут пресегами своими, таковые именей своих отчызных и матерыстых и вена пред учынком тое зрады им от мужей их описаного не тратят^[1] але до именей отчызных не прійдут, хиба по смерти маток своих только до четвертое части именей матерыстых пріходити будуть.

АРТЫКУЛ 4

О ображенье маестату господарского.

Теж коли бы хто якого кольвек стану был найден явно подойзреный, иж маестат наш господарскій образил, таковому жаден привилей ани зацность ани достоенство не маеть помагати ани се им щытити можеть, абы се не мел справовати, и где будеть правом поконан, абы не мел каран быти. А хто бы в час^[2] милуючы пана Бога и пана своего и Реч Посполитую справедливе перестерег або обявил, повышенья годен будеть. А за обмовенье славною о парсуне нашой господарской за доводом слушным справа и суду маем карати ведле важности выступу и слов, ведже ласкою нашою господарскою, а честью и горлом ани именья отнятьем за то карати не будем; ведже в том выступе коло ображеня маестату нашого господарского, где кому идеть о честь и о горло, таковых шляхту подданных наших нигде индей, одно у здешнем панстве нашом Великом Князстве Литовском на соймех валных тутошнего панства, мы Господар с паны рады нашими судити водле выступку их тым каранем, яко вышей описано, карати маем.

АРТЫКУЛ 5

О ображенье маестату господарского такій довод, а не инакший маеть быти.

Яко в кождом учынку, за которій гордом карають, потреба доводов явных и ясных, так во ображенью маестату нашого неледа за осоченем або вымовеньем маем се на подданных наших сквапляти; але хто на кого ображене маестату ведеть, мает довести сведецтвом веры годными и неподойзреными людми шляхтою и их своею присегою. А если бы хто кого обмовил в том учынку, а звлаща иж бы на него менил, же пам Господару на здоровье стоял або Реч Посполитую зрадити и ку прудкому упадку привести хотел, и на тое се важил и готовал; такій поведач, если бы таким же ясным сведецтвом не довел, сам отсуженем почтивости и горлом маеть быти каран.

АРТЫКУЛ 6

Хтобы колвек с панства нашого до земли непріятельское утек.

Теж уставуем, хтобы кольвек с подданных наших с панства нашого утек до земли непріятельское умыслом злым на зраду ку шкоде нам Господарю и Речы Посполитой, такій честь тратит; а если бы поиман был, тогды и горлом маеть быти каран. А дети ач колвек для того выступку отца своего почтивости свое не тратят, але именья вси отцовскіе тратят, ниж бы што мели власного набытья своего, або перед тым учынком отца своего отделены были, тогды при том застати мають. Таким же обычаем и жоны если будуть не ведали здрады мужов своих, таковые в том будуть захованы, яко в третем артыкуле сего розделу о таких есть описано.

АРТЫКУЛ 7

Хто бы с пригоды до земли сусед наших втек.

Уставуем теж, если бы хто з якое пригоды припалое кром ображенья маестату нашого и Речы Посполитое зехал до земли якого суседа нашого, выймуючы земли Московскіе; таковый почтивости, горла и именья не тратить, одно маеть справоватися тому от кого будеть обвинен и ласки нашое господарское перенайдовати за кглейтом нашим, а тот кглейт наш на врадех, и ввезде где ся оборочати будеть, а особливе по местом торгом и при костелех, маеть давати обволывати и прибиваньем цедул ознаймованьем и рок выйстя кгдейту оповедати, а то для того абы собе лепшую безпечность мети мог. А если бы в том часе не переправил собе ласки нашое господарское и тому кому завинил не справилсе; тогды мають такового за се из границ панства нашаго за кглейтом нашим пропустити, леч не до земли непріятельское, и то мають чынити перед выйстем кглейту, а нам Господарю волно будеть кглейтом далшим водле воли и зданья нашого господарского.

АРТЫКУЛ 8

О зкгвалцене и зламане кглейту.

Теж уставуем, если бы мы Господар кглейтом своим кого убезпечили, а тот бы кглейт ясне и значне был обволан, за которым бы он обвиненный на справу до нас пріехал; и хто бы такового под тым часом ранил або забил без его початку и причины, таковый сам маеть быти горлом каран, яко тот которій кглейт наш господарскій зкгвалтил. Тым жо обычаем хтобы з кглейтом пріехавшы, а сам неспокойне и нескромне се заховал, и кого ранил або забил и якій кольвек кгвалт учинил; тот сам собе кглейт зламал и горло тратит.

АРТЫКУЛ 9

О мондатех, в которых мають быти мандаты с канцеляреи нашое даваны.

Напервей мандаты мають быти даваны о ображенье маестату нашого господарского; теж хто бы при дворе нашом господарском кого забившы або кгвалт якій учынившы утек; хто бы теж покой посполитый взрушил, яко ест вышей о ображенье маестату нашого господарского вышей и шырей описано; хто бы на именью своем новое мыто вымышлял, або теж мытник наш господарскій и теж хто с подданных наших маючи стародавные або от нас даное мыто на именью своем або в державе своей над уставу так теж и от подданных шляхецких што брал; так теж листы и мандаты мають быти даваны в речах и в пожитках столу и скарбу нашого господарского належачих и о иншые некоторые речи. Кром вышей мененых артыкулов мандаты никому с канцеляреи нашое не мають быть даваны; а если бы были даваны, тогды сторона оную^[3] реч, кром тых мандатов наших, будучы позвана и ставши очевисто неповинна будеть отказовати, а за мандатом нашим маеть зложон рок завитый.

АРТЫКУЛ 10

Хто бы кому именье заставил а продал первей, нижли з земли утек.

Теж если бы хто которій человек, перед тым нижли утечеть до земли непріятельское, будучы еще в панстве нашом, продал або запродал именье якое або люди або землю кому, а будет ли он тое рады его не ведал, и на то право поднесеть и окажет на то листы и держанья своего доведет; тогда маеть он тое купленое або закупленное именье спокойне держать, а пак ли бы не хотел присегати, тогды тое купленое або закупленное именье тратит.

АРТЫКУЛ 11

Если бы отец от детеи втек до земли непріятельское, так теж который ближшый.

Теж уставуем, если бы отец от детей утек до земли непріятеля нашего Московского и до иншых земль непріятель наших, а дети бы на именьи зоставил по себе; тогды именья его на нас Господаря спадывають, бо за выступ отца их власного вже сут отдалены от именей. Ведьже которій бы сын был делный от отца своего и первей тое части своее в держанью был, нижли утек отец его, и мешкал бы на том кром отца своего не у в одном местцу з ним, а не за одным плотом^[4], а тое рады и учынку отца своего не ведал, а не был подойзреный и вывелся того присегою своею; таковые тогды сыны и дочки от почтивости своее от части именья своего не одпадывают. А если бы которій прирожоный брат або девка^[5] або который будь з роду утек до земли того непріятеля нашого Московского и до земль непріятельских поганских; тогды делница, то есть часть невыделена не будеть выделена была, будь не выделена^[6], спадывает на нас Господаря, и ближній жаден не будет ку тому и не маеть мети ничого; а ведьже то братьи и близким яко в почтивости так и частем именьям их шкодити не маеть. А хтобы такового здрайцу утекаючого забил, або живого до нас и до вряду нашого привел, и то на его слушным доводом перевел; такового почтивости то шкодити не маеть, але еще за то будет годен ласки нашого господарское, а если бы не довел, тогды сам маеть быть каран, яко вышей описано.

АРТЫКУЛ 12

Хто бы листы або печати наши фалшовал, чым маеть быти каран.

Коли бы хто листы або печати наши фалшовал, або на кшталт руки нашое также с канцлярейных писаров наших того панства подписовал, або хтобы теж печати наши соберыв и в себе ховал и их ужывал; таковый за оказаньем слушным явностью певною и доводом слушным ничим иным толко огнем каран быти маеть. Ку тому если бы теж хто печати и выписы врадовые переправовал, тестаменты на заставу фалшовал, або одбираючи печати от листов к другим прикладал ку помочы и ку пожытку собе а ку шкоде стороны своее противное, а то бы се на праве нашло и оказало; тот тую реч, о што тые листы идуть и о што за ними право ведет, тратит и горлом каран предсе маеть быти. А хтобы листы фалшывые на якую реч набытую показал, которіе бы по чіей смерти з именьем або с чим кольвек до рук его пришли, за кими листы чого вжывал тот ближшый ^[7]; на том присегнути, иж такіе листы по смерти тых, от которих се ему достали з именьем або которою кольвек речю, и за тым тое стороны почтивости и горлу шкодити не будет, а о тую реч, о што право идет, предся мовити можеть и правом поступовати и ку листом мовити, если против праву але недотливее^[8].

АРТЫКУЛ 13

О фалшованью монеты о мындзех и о золоторех.

Теж хтобы монету нашу фальшовал и без воли нашое переправовал и обрезовал, так теж мындзаре наши, которіе золото и серебро и иншую реч матереи^[9] належачую и прислухаючую мындзе фалшовали бы зливали и мешали ку пожитку своему а ку шкоде Речи Посполитое, а то бы на них досведчано; тые мають огнем караны без иилосердья. Потомуж золотари, которіе золото серебро фалшують и межи того мешають медь цын або олово, и в том бы были дознали; тогды сами мають огнем быти караны, а их маетность тому, кому шкоду учинили, маеть быть плачоно. Ведьже работа тая и матерея, без которое бы тое ремесло их справовано быти не могло подле звыклости ее, то фалшем розумено быти не маеть.

АРТЫКУЛ 14

Не маеть никто ни за чій кольвек учинок терпети только кождый сам за себе.

Теж уставуем, иж нихто ни за чій кольвек учинок не маеть каран и сказан быти, толко которим винен, кгдыж того право божое и справедливость хрестіянская учыть, якож так хочем мети: абы ани отец за сына ани сын за отца, кром ображенья маестату нашого, яко вышеи около того ест описано, ани жона за мужа, ани муж за жону, так теж брат за брата, и жадный прирожоный, и слуга за пана, пан за слугу, нихто ни за чій выступ учынок, толко кождый сам за свой выступ мает терпети и каран быти.

АРТЫКУЛ 15

Хтобы много за мало упросил а без данины побрал.

Теж хто много за мало упросил, а то бы на него устне и с права было переведено, вышей нижли просил, таковый тую выслугу свою от нас даную тратит. А хотя бы и добре упросил, а без данины нашое што и к той выслуге своей взял и к тому привернул; предся тую выслугу и забранье тратит и спадывает то за се на нас Господаря. А хто ку отчызному своему именью взял чоловека, або и десети, або колко колвек и с землями, або земли пустое; тогды маеть кождого чоловека, колко будет взял, своими отзычнами навезати з земли, або кождую землю землею, а ведже не не на голую повесть и обмову, але за огледаньем и выведаньем слушным и справедливым правным поступком и доводом через людей цнотливых и веры годных комисаров тубулцов. Ровностью права однакими доводами вдаючы се^[10]  в ровное право и з шляхтою, яко о том нижей написано.

АРТЫКУЛ 16

О реч земленую, межы именьями нашими князскими панскими шляхецкими, мы Господар одным тым правом судитисе маем.

Теж мы Господар обецуем и хочем, абы тое через нас и потомков наших споры розница межи кгрунтами нашими шляхецкими вечно было держано, гдеж бы се трафило в именьях наших споры розница межи кгрунтами нашими ^[11] шляхецкими и межы тыми именьями, которые вышли з данины нашое, иж в той речы земляной маем мы и потомкн наши Великіе Киязи Литовскіе тым же одным правом яко и подданные наши Великого Князьства судитися а не иначей, чій довод будеть слушнейшій водле права, тот ку доводу маеть быти припущон.

АРТЫКУЛ 17

Вси в том панстве нашом великом КнязствеЛитовском одным тым правом сужоны быти мають.

Уставуем теж и вечие а неотменне мети хочем, абы все подданные наши всех станов, так богатого яко и вбогого, почоншы от княжат панов рад духовных и свецких панов хоруговных и шляхты, аж до нижшого стану, одным тым правом от нас даным были сужоны; и всякіе речы, почоншы оть почтивости горла достоенств маетности именей всяких справ земленых лежачых рухомых, аж до наименшое речы, а не инакшым правом але тым статутом от нас даным мають быть сужоны. Также и чужоземцы и заграничники Великого Князства приеждчые и яким кольвек обычаем прибылые люди тым же правом же мають быть сужоны и на таких врядех, где выступить.

АРТЫКУЛ 18

О листеях заповедных, иж не мають быти с канцляреи нашое выдаваны.

Теж уставуем, иж листов наших заповедных на продлуженье справедливости людское, яко кольвек повстегаючы або задержываючы, от сих часов на потом до всяких судов мы сами и потомки наши Великіе Князи Литовскіе давати не будем, окром трох члонков: первое если бы хто о Реч Посполитую в непріятелей наших у везенью был; другое коли бы хто на службе нашой и Речи Посполитое в посельстве до земль чужых або заграничье панств наших, где ся будет дотыкало Речы Посполитое, и в инших речах господарских властных послан, и к тому особливе в потребах яких кольвек водле часу припалых потребы отправуючы ими ся забавил, в таковых речах и справах не только листы наши господарскіе але и панов рад наших ити могуть и местце у праве мети будуть; третее коли бы хто правдиве немоцон был, тогды толко которій не стал, маеть на другом року присегнути, иж правдиве немоцон был. А у в инших речах кроме тых члонков хотя бы и выданы кому были; тогды врадники наши то есть суд замковый земскій и мескій, таковых листов заповедных ку кривде одное стороны одержаных неповиины пріймовати ани их послушни быти.

АРТЫКУЛ 19

Листы отвороные мають быти кождому ворочаны.

Теж хтобы листы наши отвороные в жалобе своей до кого принес, будь до князя, або до пана, або до державец, або земенин до земенина, а хто бы колвек з них оный лист отворенный прочетши у себе держал и копею з него знявшы под печатью вознаго оному не хотел вернути до трех дней; тогды таковый за противность свою нам Господару у вину упадывает у дванадцать рублей грошей, а стороне також маеть заплатити. А ведьже листы отвороные мають обычаем слушным даваны быти через возного и пред людми сторонными шляхтою.

АРТЫКУЛ 20

О битью посланца нашого господарского, и теж посланцов от панов рад наших при листех наших господарских и панов рад и старост наших судовых и суду земского.

Уставуем, хто бы посланца нашого господарского, и теж посланцов панов рад наших, за листы нашими и за листы панов рад наших и старост судовых и суду земского, збил и листов не учтил, або листы подрал ку зелжывости нашой и рад наших; тот маеть за слушным доводом, если на него очевисто переведут дванадцать недель на замку нашом седети, а дворанина совито, навезать водлуг стану его. А дворанин кгды листы подавать маеть, мает меть при собе сторону, то есть двох шляхтичов для доводу. Так теж и сторону, которых будет мети при собе дворанин, если бы хто забил або якую легкость учынил, маеть совито водлуг стану их навезати. За листы и в справах урядовне посланые ездячы мають скромне и учтиве се заховать, и жадное прычыны ку именью и зелженью своему не давать и ничого неслушнаго не почынать, одно то справовати, што вряду его наледыть и с чым пріехал.

АРТЫКУЛ 21

О листех заручных.

Теж абецуем и маем давати о безпечность здоровья подданых наших шляхту, за похвалками и звазненьем чіим кольвек противко их кождого, з великих кровных аж до нижных станов, с канцляреи нашое листы заручные, и заклады на них казати описовати пять сот коп грошей наименшей, а болшей две тысечы коп грошей, а над то вышейописаные заклады никому так с болших яко и з менших станов шляхецскаго народу даваиы быти не мають. А того канцлярейные писары наши господарскіе земскіе Великаго Князства Литовскаго догледати и вважати (sic) мають, кому пять сот коп грошей а кому две тысечи коп грошей в листех заклады описованы и даваны быти мають. А хто бы за похвалкою або звазньем своим обнесен будучы урядовне листом нашим заручным, а через тот заклад кого забил; тогды справа за слушным доводом горлом маеть быть каран, а заклад на нас Господаря до скарбу нашого земского Великаго Князства Литовскаго на ииенью его маеть быти с правлено. А еслибы не забил, толко ранил або збил; тогды с права также за слушным доводом заруку нам Господарю маеть платити, а тому битому маеть быть справлено навезка совита водле стану его. А хто бы заруку выневшы, сторону противную, на которую заруку взял, самого его забил або бил або ранил; тот сам таковою ж виною маеть быть каран. А мы Господар не маем таковых закладов никому отпущати, але кажем брати до скарбу нашого земского Великого Князства Литовского; а в небытности нашой в здешн ем панстве воеводове старосты державцы судовые, где книги лежать, будуть мочы листы заручные под печатми своими шляхте давати, уважаючы кому якій с тых двух сум заклад маеть быти даван.

АРТЫКУЛ 22

О отповедниках неоселых.

Теж уставуем, если бы хто кольвек неоселый, будь тубулец панства нашого Великаго Князства яко и чужоземец, кому теж колвек иншому отповедь обличне або через листы або теж заочне учынил; таковый отповедник маеть быть поставлен от нас Господаря або от вряду замкового або и земского перед правом, где бы колвек при котором вряде то се деяло, и если бы он тое отповеди пред врядом довел, тогды таковый отповедник неоселый маеть быти на замку нашом посажон, а седети маеть дванадцать недель), не маеть быть с того везенья пущон, аж первей себе рукоемством увыйстит, абы тот, против кого отповедь учинил, в покою был.

АРТЫКУЛ 23

О листех железных, кому мають быти даваны.

Теж уставуем, иж листы железные с канцляреи нашое не мають быть даваны тем, которые маетности своей на збыткох марне тратили и за таковыми збыточными тратами в долги попали, але тым маеть давати таковые листы, которые бы в долги пришли и в убозство попали з Божего допущенья: то есть, если бы огнем погорели або маетности их стонули, албо бы от разбою от непріятеля нашого забрани были, або хто бы теж для Речы Посполитое ку утрате у в убозство пришол. А веджо далшого часу и волности не маеть тым узычати и давати толко в наибольшой суме и речы три годы, а в том часе маеть се в наибольшой речы и суме тот о заплату старати. И людем простым купцом и жыдом против шляхты таковых листов не маем держати, а веджо кому будь хотели такового листу железного узычити, и то предсе не напротив шляхты; тогды с канцляреи нашое тот маеть быть отослан до вряду его належачого, отколь есть. Перед которим врядом хто таковаго листу железнаго потребуеть, маеть рукоемство слушное поставити людей добрих оселых и куститися ими и их маетностями, иж не згинет в тых же летех, яко на листех ему назначоно, а на остатный день выйстя року будуть повинны рукоимы оного на том же вряде поставить, а должники долгов своих и оного истца в того вряду упоминати и найдовати и доходити будуть; еслибы рукоимы не поставили и в том се оным не всправедливили, тогды сами за листы або за доводом правным тые долги повинны будут платити.

АРТЫКУЛ 24

Кому бы шло о честь, як рыхло справедливость учынена быти маеть.

Теж обецуем и будем повинни каждому с подданых наших, кому бы шло о честь прудкую а неодволочную справедливость учынити, а если бы на нас Господаря зашли якіе трудности; тогды таковой справе в годы чотыри роки складаем. А где на першом втором або на третем року пред ся за недоспехом нашим не могли быхмо конца в той речы учынить; и до того четвертого або розсудку нашого того оного обвиненаго почтивости шкодити не маеть. А хотя бы умер або забит был, не дождавшы оного розсудку нашого; тогды ему ани потомком его почтивости шкодити не маеть. А приганенный службы нашое земское не мает се вымовляти, ведже четвертого остатнего року и войною се вымовляти не 6удеть мочы.

АРТЫКУЛ 25

О мыттх новых.

Теж уставуем и приказуем, абы жаден человек в том панстве нашом Великом Князстве Литовском не смел новых мыт вымышляти ани встановляти ни на дорогах, ни на местех, ани на греблях, ани на реках, ани в торгах, ани в местечках ни в стодолах, або в корчмах на гостинцах в именьях своих, кроме кол торые бы были з стародавна установлены, або мели бы на то листы продков наших або наши. А хто бы кольвек смел мыто кром звычайнаго торгового установляти; тогды тое именье, в котором мыто кром торгового установил, тратить и спадывает на нас Господаря. А которіе здавна и за привильями и листы нашими мыто и мостовое на именьях своих на дорогах гати мосты гребли и ровы направовати мають, а хто бы где мостов гатей гребели направленых не мел, а для того бы переезд был трудный, а кому бы се на тых местцах шкода стала; тому тот же пан, хто мыто берет, винен будеть шкоду оправити и з накладом, што ищути шкоды наложыть. А старостове державцы або мытники наши, еслибы такеж беручы мыто дорог не поправовали на именьях наших; тогды шкоду и наклад тому, што ищучи хто наложить, винны будуть платити. А которіе теж князи панове и земяне шляхта старіе дороги ставы своими затопят, або заорут, привлащаючи собе пожытки; таковые новые дороги мають быти погачоны и положоны не ку кривде людем перееждим, але што могут быть напростей и так, або были напровованы, жебы з возы тяжкими у везде безпечный переезд был. А к тому иншые стародавные дороги на именьях и на кгрунтех своих в местцах потребных поправовати, мост мостити, гати гатити, тые которіе з стародавна людьми то робливали и вперед будуть повины. А кгды бы на чыем именьи або на кгрунте злый переезд был, а шляхтич хотел бы его поправовати, а с того себе за наклад свой пожиток мети; тогды тот маеть до нас Господаря утечы, а мы, доведавшыся того через посланцов або старост наших ку тому прилеглых, маем ему дати и встановити от купцов и иншых переежджых людей мыто або плат, водле важности и наклады его и ласки нашое господарское. Так теж и мытники наши в местечках и селах князских, панских, боярских, где первей мыто не бирано, часу праздников и сходов жадных мыт и торгового вымышляти и брати не мають ^[12] кгвалт и шкоду совито платити. А на реках портовых, и на которых порт может быти, а где кольвек в панстве нашом Великом Князстве, жаден ставов новых становити и гребли сыпати ку переказе порту и спусту не маеть мети. Так теж и езы на реках портовых, где з стародавна бывали, хтобы ставил; тогды предсе маеть местца заставляти так слушие, абы езом або тамованьем никому се шкода не стала. А таковых речей воеводове, старостове, державцы наши кождый в державе своей мають досмотрети, а новых мыт абы на реках портовых и на ставех и на греблях не было, также на езох абы проходы были слушные без завады заставованы.

АРТЫКУЛ 26

О неданье мыта шляхте.

Теж з ласки и доброти нашое господарское князем, паном радам духовным и свецским, шляхте в том панстве нашом тую вольность на водах на дорогах, то ест сухим путем и водным, на торгох, на мостех, так по именьях наших^[13] спущати и продавати з их власных гумен, кождому его роботы правдивое збожье а не купленое, от того мыто не маеть быти давано; так теж и од подвод шляхецских, которіе з их речми властным збожьем а стацыями ходять от того всего мыто и мостовое брано быти не маеть. А если бы што купленого збожья и иншых речей пры том мел; от того мыто маеть платити. А ведже сами особами своими, або где бы их самих при том не было, тогды слуги их або справцы от них притом посланые веры годные на мытех наших головных мають присегнути, што ест правдивое роботы его домовое а што теж прикупленое, а подводы мають без присеги быти пропущаны толко за листы и печатми их, тым же обычаем и лесные товары и от всякого господарства домовое роботы маеть ся разумети и безмытне пропущоны быти. А на мостех старожитных, где перед тым што будеть давано только от подвод таких, которіе збожье на продажу везуть, ведже водле стародавного обычаю мають давати.

АРТЫКУЛ 27

Хто напротивко выроку наіиого господарскаго мовил.

Теж уставуем, кгды быхмо мы Господар с паны радами нашими з выроку нашого сказанье учынили, а хтобы против тому выроку нашому по сказанью што против его мовити мел; тогды таковые, якогож кольвек стану так высокаго яко и низкаго, мають седети на замку нашом шесть недель, а то никому не маеть быти отпущоно.

АРТЫКУЛ 28

Хтобы под ким што упросил, а тому напрод дано и в привильи нашом господарском напрод описано.

Уставуем теж, хтобы под ким именье люди земли в нас Господара упросил и в привильи бы то собе описал, а у того бы, под ким то он собе упросил, первей было на дате его або на привильи нашом описано и тому потвержоно, и того он колко лет вжывал и в держанью был; тогды таковый первый привилей або листы при моцы мають зостати, и за иншых господарей потомков наших тот, кому дано, тую реч держати и поживати маеть водлуг листов и потверженья нашого, а последніе листы ни во што мають обернены быти.

АРТЫКУЛ 29

Хтобы на што листы упросил, а того в держанью не был.

Теж уставуем, если бы хто собе в нас Господаря именье люди або землю впросил и в листе данины нашое ему то было описано, а того в держанью и в поживанью не был до десети лет; тогды и листы наши и дата таковая потом жадное моцы мети не маеть. Так теж, и справуючись водле прав хрестіянских и теж остерегаючы, абы межы поддаными нашими небезпечность и ростырки не множылисе, уставуем, абы от сего часу жадные листы, которые по латине експектативами зовут, жадное моцы не мели, а хотя бы от нас кому даны, предсе держаны быти не мають; нижли если бы хто сам по своей доброй воли перед нами Господарем з волею нашою господарскою на то прызволил.

АРТЫКУЛ 30

Абы се у дворех наших господарских нихто не становил.

Теж уставуем, иж жаден пан, а нихто с подданных наших, Великом Князстве Литовском ездечы дорогами, не мають ся становити и стацый на себе и на кони свое з дворов наших брати, ставов и сажавок и озер наших волочыти. А если бы хто против тое уставы нашое учынил, а в дворех наших становилсе, стацыю собе и конем своим з дворов наших брал, ставы и сажавки и озера нашы волочыл; тогды за слушным доводом и с права в том поконаный маеть на замку нашом дванадцать недель седети, а шкоду оправити.

РОЗДЕЛ ВТОРЫЙ. О ОБОРОНе ЗЕМСКОЙ

АРТЫКУЛ 1

О повинности яко вси обыватели Великого Князства литовского чынит мають.

Уставуем теж с призволеньем рад наших зуполных и всех станов подданных панства нашого Великаго Князства, иж кождый князь и пан дховный и теж дворянин боярин и вдовы кождые и иные станы, и татарове наши, так мещане мест наших, маючи земское именье и лета зуполные маючы, часу потребы з нами и потомками нашими або при гетманох наших винни будуть сами особами своими войну служыти и выправовати на службу военную, коли бы кольвек была потреба водле уфалы земское соймов наших Великаго Князства, якая на он час будеть потреба оказовати ^[14], то ест и похожых з именей з людей, яко будет потреба, отчызных выслужоных и купленных. А вдовы и сироты и дети лет зуполных не маючи мають выправовати водле важности именей своих, а тым обычаем; маеть быти выправа пахолка зо всим на добром кони, што бы кон стоял наименшей осм коп грошей литовских, а на нем сукня цветная, панцер, прилбица, меч, павеза древо с прапорцем цветным. А который бы боярин або мещенин не мел в своем именью людей так много, яко устава будеть, тот сам предсе маеть ехати и служити; так теж которій не маеть пешо ити з ручницою або з рогатиною, а на местцу наименованом через листы наши або гетмана нашого великого маеть ся очевисто каждый становити и датися написати и ошафовати гетману нашому великому на тот день, которій через нас або через гетмана нашого к тому попису будеть положон и выволан. А коли бы было колко братьи неделеное; тогды братья мають межы себе годнейшаго лет дорослых выбравшы послати, который з именья неделеного маеть войну служыти тым же обычаем, яко вышей описано. А хтобы от нас Господаря держал якое именье нашо в заставе; тогды тот не повинен будеть выправовати на войну. Хочем теж мети и уставуем, абы подданые нашы вси мещане ку валной потребе з иншыми людьми нашими войну служили, або з дозволеньем нашим водле постановеня нашого на войну выправовали. А хто бы кольвек с тых подданых наших шляхты и рыцерства всякаго стану, также маючы именье земское, войны не служыл, або пріехавшы на рок постановеный не пописал, а хотя бы и пописался, а шыфу не ждал, або и шыховавшы се без воли нашое або от гетмана нашого великого проч поехал; тот именье свое все тратит под тым обычаем, яко бы войны не служыл. И для того ж кождого гетмана великого мы Господар обецуем тот уряд (т.е. гетманство) годным и досведчоным людем народу шляхецкого родичом стародавным тутошнего панстдем Великого Князства Литовскаго давати, и тое местце засаживати.

АРТЫКУЛ 2

О постановеню обороны земское только на сойме.

Обецуем и уставуем вечными часы быти держано, иж кгды будеть потреба противко которого непріятеля нашого обороны земское сему панству нашому Великому Князству Литовскому, албо валка вести; тогды мы сами Господар або и с паны радами нашими не маем ани будем мочы того учынити, ани серебщызны и поплату никоторую установляти, аж первей сойм великій вальный зложывшы в том панстве нашом Великом Князстве Литовском, на котором за росказаньем и листы нашими будуть повинни вси княжата и панове рады духовные и свецскіе, маршалки и иные врядники земскіе и дворные, панове хоруговные, послы земскіе поветовые зехатися; теж на он час на сойме великом валном зо всими радами нашими и зо всими княжаты и паняты и зо всим рыцерством порядою а позволеньем их маем таковые речы становити а не иначей. А ведьже где бы от котораго непріятеля нашого якое прудкое уторгненье было в се панство наше Великое Князство; тогды и без сойму толко за листы нашими, а в небытности нашой за листы панов рад наших гетмана нашого великого мають вси князи и панове подданые нашы, войны павинны, на час и местце назначоное ехати, яко на кгвалт, и то з милости Речы Посполитое боронечы собе жоны и детей маетности отчызны своее.

АРТЫКУЛ 3

О невызволенье листы нашими, и теж кого волно вызволити.

Теж уставуем, иж мы не маем жаднаго з войны от службы земское так словным росказаньем яко и през листы наши вызволити из войска отпущати, так теж и гетманове наши не будут мочы вызволити и з войска отпущати, кром тых врядников наших и слуг, которих мы Гоеподар на он час для послуг наших и справ земских зоставим, а ведже и тые почты свои водле можности именей их винны слати и выправовати. А што се дотычеть старост и державец украиных, тые часу вальки также повинни з именей своих у войско, яко иншые шляхта, почты свои ку службе земской выправовати и становити. А сами они, звлаща тые, которіе быхмо у войско листы нашими и панове рады або гетман наш не казали ити, таковые почты свои, што з урядов своих новинни, становити мають.

АРТЫКУЛ 4

О именья заставныя, хто з них службу земскую служити мает.

Теж уставуем, если бы который шляхтич або пан хто закупит и в держанью будеть, службу земскую с того заступовати маеть. Нижли если бы тот собе на записе заставном обваровал; а тот, хто заставит, тым описом своим в то бы се подал, иж сам с того именья службу земскую служыти маеть; а он хто закупил в том волен будеть. А ведже хто за таким обычаем, естли бы тот, хто закупует, мел оселости и может службу земскую сам служыти, а кгды бы оселости яковое и можности не мог мети; тогды предсе тот, хто закупует и вжывает, сам с тое закупли маеть службу земскую служыти.

АРТЫКУЛ 5

О Хоружых.

Хоружества всих землях и поветех Великого Князства тым радом и способом мають быти захованы, иж мы Господар хоружых нашых не маем уставляти толко людей зацных добрых ростропных можных и оселых о повете том. А хоружый, и где будеть хоругов держати, маеть на собе мети зброю добрую и гелм албо прильбицу и бронь, а конь абы был под ним добрій, а хоругов сам хоружый в гуфе своем на шыху и ку потребе маеть держати, и статечне се в том вряде на потребах наших земских маеть заховывати водлуг цноты и повинности на хоружих належачое; а хорогвы мають им даваны быти за скарбу нашого подлуг давного обычаю; а хоружые земскіе и дворные мають быти подлуг стародавного обычаю захованы.

АРТЫКУЛ 6

О збиранью и тягненью шляхтена войну.

Теж мы Господар для поряднейшаго тяготенья на войну, абы в том шкода не была людем, так уставуем, иж где за потребою земскою будет от нас и панов рад албо гетмана всей земли росказано на войну ехати; и тогды хоружый, давшы ведомость о том шляхте, каждый у своем повете, маеть выехати сам у поле и казати до себе всим поветиком своим за тры дни перед тегненьем с повету зехатися; а они будуть повинни и до войска к нему не вымовляючыся ехати в том часе и на тое местце, яко им от нас дано и назначоно будеть, с почты своими яко на войну служыти повинни зехатися. И там же хоружому собравшыся з ними и маючы о кождом з них добрую ведомость и печу посполу маеть тягнути з ними до каштеляна, давшы о собе первей знати, где бы се мели ку нему стегнути; и там с каштеляном зехавши се хоружый оный повет шляхту отдати и оповедати каштеляну и ознаймити маеть, если все сполна албо и хто есть… А где в котором повете каштеляна нет ино до маршалка, которій в том таковую ж моц мети будеть яко каштелянове. И кгды вжо и к каштеляном стягнутца хоружыя и з шляхтою, тогды вси сполом под каштеляновою або маршалковою справою тягнути мають до воеводы того воеводства; и тягнувшыся з ним кашталян або маршалок с хоружым мають здати и оповедати шляхту воеводе, кого нет, а за чим где. Вже вси тые як панове воеводове и кашталянове и маршалкове и с хоружими мають тягнути на местце от нас и панов рад наших назначоное, або гетману где росказано будеть, и у в одном местцу завжды при воеводе становитися а не порозну, будучы в послушенстве и справе панов воевод своих. А в том тягненью воевода маеть того с пильностью стеречи и боронити повинен, абы поветники его никому никоторое шкоды в дорозе и на стане стоечы ни в чом не чынили, але собе и конем своим за пенези торгом а не уставою живность куповали; а который бы над заказ смел кому которую шкоду учинити, тогды воевода або кашталян, поки до пана гетмана не дотягнуть, мають им с таковыми справедливость учинити и отправу на винном и на маетности его сам заразом не проволокаючы делати, а поветники шляхта будеть у его повинни во всем том яко вышей описано послушни быти, а против непослушным и противным также повинни заховатися и карати их мають, осадившы о нем право, и што с права заслужыт, то втерпит.

АРТЫКУЛ 7

Уси шляхта поветовые повинни становитися под хороговью поветовою. ...